Richard Aldington

Richard Aldington, Edward Godfree Aldington izenarekin jaioa (Portsmouth, 1892ko uztailaren 8a – Sury-en-Vaux, 1962ko uztailaren 27a) ingeles idazlea izan zen.

Bi gurasoek liburuak idatzi eta argitaratu zituzten, eta etxean Europako literaturako eta literatura klasikoko liburutegi handi bat zegoen. Irakurtzeaz gain, tximeleten bildumazaletasuna, mendi-ibiliak eta hizkuntzak gustuko izan zituen Aldingtonek.

Ezin izan zituen ikasketak amaitu, familiaren zorrak zirela eta, eta kirol-kazetari lanetan hasi zen, baita olerkigintza egunkarietan argitaratzen ere.

Hilda Doolittle poetarekin ezkonduta egon zen 1913 eta 1938 bitartean, eta T. S. Eliot, D. H. Lawrence, Ezra Pound, W. B. Yeats, Lawrence Durrell, C. P. Snow eta beste idazle batzuk ezagutu zituen. Horiek guztiek gerra aurreko poesia, filosofia eta feminismo molde berriei buruzko iritziak partekatu eta eztabaidatu zituzten.

Aldingtonen olerkigintza imagismoarekin lotu zen, bertso libre minimalistarekin eta viktoriar moralismoaren abandonuarekin. 1914 eta 1916 bitartean Aldington ''The Egoist'' aldizkariko editore literarioa eta zutabegilea izan zen.

1916ko abenduan, Lehen Mundu Gerran Frantziako frontean borrokatzeko iritsi zen. 1919ko otsailean itzuli ahal izan zen etxera, eta ez zen inoiz gerraren traumatik erabat sendatu. 1925ean nerbio-krisia izan zuen eta 1928an Parisera joan zen bizitzera. 1938an Hilda Doolittle dibortziatu eta Netta McCulloughekin ezkondu zen. 1948an Estatu Batuetara joan zen eta biografiak idazten hasi zen. Frantzian hil zen 1962an. Wikipediatik informazioa lortu